កំពង់ស្ពឺ៖ តាមលទ្ធផលប្រឡងសញ្ញាបត្រមធ្យមសិក្សាទុតិយភូមិដែលប្រកាសនៅថ្ងៃទី២៣ ខែធ្នូ ឆ្នាំ២០២២ សិស្សជាប់និទ្ទេស A នៅខេត្តកំពង់ស្ពឺ មានចំនួន ២២នាក់។ អភិបាលខេត្តកំពង់ស្ពឺ លោក វ៉ី សំណាង បានប្រកាសថា នឹងផ្តល់រង្វាន់ម៉ូតូម្នាក់មួយគ្រឿងដល់ពួកគេ។

លោកអភិបាលខេត្តកំពង់ស្ពឺបានអបអរសាទរចំពោះសិស្សានុសិស្សដែលបានប្រឡងជាប់ និងកោតសរសើរចំពោះសិស្សៗដែលខិតខំប្រឹងប្រែងសិក្សារហូតទទួលបាននិទ្ទេស A។

លោក វ៉ី សំណាង បាននិយាយដូច្នេះថា៖ «ដើម្បីលើកទឹកចិត្តដល់ក្មួយៗ អ៊ុនៅតែរក្សារង្វាន់ "ម៉ូតូ" ម្នាក់មួយដដែលសម្រាប់សិស្សនិទេ្ទស A»។

ក្រៅពីខេត្តកំពង់ស្ពឺ អភិបាលខេត្តដទៃទៀតក៏ប្រកាសផ្តល់រង្វាន់លើកទឹកចិត្តដល់សិស្សនិទ្ទេស A ផងដែរ ខណៈឆ្នាំកន្លងៗទៅ ភាគច្រើនផ្តល់ជាម៉ូតូ និងកុំព្យូទ័រយួរដៃ និងថវិកាលើកទឹកចិត្តមួយចំនួនទៀតផងដែរ៕